Deustuko Unibertsitateak “Europako aurreikuspen politikak enpleguan” jardunaldia hartu zuen. Enplegu, Gizarte Kohesio eta Berdintasuneko Bizkaiko Foru Aldundiaren sailak antolatutako topaketa izan zen, eta enplegu-politikek gizarte, ekonomia eta lan arloko eraldaketei aurrea hartzeko duten gaitasuna izan zuen ardatz.

Jardunaldian azpimarratutako ideia nagusietako bat lan-merkatuaren bilakaera behatzetik enplegu-ekosistema bat eraikitzera igaro beharra izan zen, ezagutzan, lankidetzan eta gobernantza partekatuan oinarrituta.

Aurreikustea ez da etorkizuneko enpleguak eta gaitasunak soilik aurreikustea; aldaketak ulertzea ere bada, garaiz jardun ahal izateko eta pertsonak enplegu-politiken erdigunean kokatzeko. Ildo horretan, enpleguaz hitz egiteak pertsonen bizi-proiektuez, autonomiaz, segurtasunaz eta ongizateaz ere hitz egitea esan nahi du.

Jardunaldian jasotako ikaskuntzen artean, datuak izatea ez dela nahikoa nabarmendu zen. Beharrezkoa da ezagutza erabaki, politika eta ekimen bihurtzea, horien eragina ebaluatu eta etengabe hobetu ahal izateko. Era berean, kalitatezko, duinak eta seguruak diren enpleguak sustatzearen garrantzia azpimarratu zen, pertsonen eta lurraldeen garapenari laguntzeko.

Aurreikuspenak, gainera, esperimentatzeko, ebaluatzeko eta ikasteko gaitasuna eskatzen du, baita administrazioen, enplegu-zerbitzu publikoen, enpresen, unibertsitateen, gizarte-eragileen eta erakundeen arteko lankidetza indartzea ere. Horretarako, ezinbestekoa da konfiantzan eta ezagutzaren trukean oinarritutako sareak sortzea.

Eraldaketa teknologiko, demografiko eta ekologikoek markatutako testuinguru honetan, erronka aldaketak aurreikustea eta gaur bertan erabakiak hartzea da, lurralde oparoagoak, inklusiboagoak eta enplegu-aukera hobeak dituztenak eraikitzen laguntzeko.

Aldalan Bizkaiko Foru Aldundiko Enplegu, Gizarte Kohesio eta Berdintasuneko Sailaren Gobernantza Planean parte hartzen du, enplegu-politiken etorkizunari buruzko hausnarketa horretan eta aurrea hartzean, lankidetzan eta etengabeko hobekuntzan oinarritutako ereduen sustapenean lagunduz.