Bizkaiko Enplegu Sareak urtea itxi du berrikuntza, aurrerapena, inklusioa eta inteligentzia kolektiboa ardatz izan dituen topaketa batekin, 2026rako lan-ildoak zehaztuz.
Jardunaldian, Teresa Laespada Enplegua, Gizarte Kohesioa eta Berdintasuna Sustatzeko foru diputatuak eta Mikel Torres Ekonomia, Lan eta Enpleguko sailburu eta Lehenengo Lehendakariordeak Bizkaiko enpleguaren erronka nagusiak aztertu zituzten: belaunaldi-erreleboa, lan-merkatuan urrun dauden pertsonen inklusioa, lan-baldintzen hobekuntza eta ongizate sozialean eragina duten faktoreak.
Enpresen eginkizun nagusia ere nabarmendu zen, aukera sortzaile eta profil profesional berrien zehazle gisa. Aldi berean, enpresek enplegu-prozesu osoan parte hartzeko eta talentura egokitutako eraldaketarako beharra azpimarratu zen.
Bizkaiko Foru Aldundiak bere konpromisoa berretsi zuen enplegu iraunkor eta inklusiboaren alde, ikaskuntza-eskolak bultzatuz, adimen artifiziala txertatuz eta iraunkortasuna ardatz hartuta. Halaber, gizarteratze eta laneratzeko beharra duten kolektiboen – desgaitasuna edo osasun mentaleko arazoak dituzten pertsonak, besteak beste – integrazioa sustatzeko apustua azpimarratu zen.
Prospektiker, Ikerfel eta ISEAK Fundazioak aurkeztutako ikerketek oinarri sendoa eskaini zuten erabakiak hartzeko, eta lanaren kalitatearen dimentsioak aztertu zituzten: soldata, bateragarritasuna, lan-ingurunea, lan-baldintzak eta egonkortasuna, generoaren, adinaren eta urteen arabera bereiziz.
Azken ondorio gisa, gaitasun bigunak enpresentzat zein pertsonentzat baliabide estrategiko gisa nabarmendu ziren, aukera anitz eta berriak zabalduz.
Ekitaldia Susana Gonzálezek, Bizkaiko Foru Aldundiko Enplegu zuzendariak, itxi zuen. Parte hartu duten erakunde guztiei eskerrak eman zizkien eta etorkizunerako helburua azpimarratu zuen: “inteligentzia kolektiboan eta gizarte-kohesioan oinarritutako gobernantza ereduan aurrera egitea, kalitatezko eta egonkorrak diren enpleguak sustatzeko”.
