Joan den ekainaren 30ean, Bilbokoganberak “Bizkaian belaunaldi-errelebo onak aurreikusten, berritzen eta sendotzen” izeneko jardunaldia hartu zuen. Topaketa honek Generalan eta Relevo Abierto proiektuei amaiera eman zien. Bi ekimen horiek lurraldeko enpresei belaunaldi-erreleboaren prozesuei aurre egiten laguntzeko sortu dira, enplegu egonkor eta kalitatezkoaren ikuspegitik.
Jardunaldiak 40 enpresa ingururen, enpresa-elkarteetako ordezkarien eta hainbat sektoretako erakunde laguntzaileen parte-hartzea izan zuen. Enpresa horiek tamaina, jarduera eta belaunaldi-erreleboaren kudeaketan duten esperientzia-maila desberdinak dituzte. Horri esker, topaketa esperientziak partekatzeko, elkarrengandik ikasteko eta konponbide bateratuak eraikitzeko gune bihurtu zen.
Hasiera instituzionala Susana González Rómulo Bizkaiko Foru Aldundiko Enplegu zuzendari nagusiak eman zuen. Bere hitzaldian nabarmendu zuen bizi dugun eraldaketa teknologiko, ingurumeneko eta sozialak beharrezkoa egiten duela inklusioa eta kalitatezko enplegua estrategia-elementu bihurtzea, inor sistematik kanpo gera ez dadin. Bestalde, Carmen Rojo Amanteguik, Bilbokoganberako Prestakuntza zuzendariak, erakundeak datozen urteetan enpresek izango duten erronka handietako bati, belaunaldi-erreleboaren kudeaketari, laguntza eskaintzeko duen konpromisoa azpimarratu zuen.
Jardunaldian zehar, Nadia Maestrok, Aldalaneko zuzendariak, Generalan eta Relevo Abierto proiektuetan jasotako ikaskuntza nagusiak aurkeztu zituen. Azaldu zuenez, gaur egungo erronka nagusia ez da soilik erreleboak gertatuko direla identifikatzea, baizik eta prozesu horiek behar bezala planifikatzeko eta kudeatzeko denbora, tresnak eta espazio egokiak izatea.
Ondorio nagusien artean, prozesuak aurrez aurreikustearen beharra, sektore eta enpresa bakoitzaren errealitatera egokitutako estrategiak garatzea, ezagutzaren transferentzia indartzea eta belaunaldi-erreleboa aukera gisa ulertzea nabarmendu ziren. Aukera horrek talentua erakartzea, enplegu egonkor eta kalitatezkoa sortzea eta enpresen jasangarritasuna indartzea ahalbidetzen du.
Jardunaldiak, gainera, RelevA+45 ekimen berriaren aurkezpen aitzindaria izan zuen. Cámarabilbaok bultzatutako programa honek belaunaldi-erreleboen inguruan egindako lanari jarraipena emango dio, eta helburu izango du langabezian dauden 45 urtetik gorako emakumeak enpleguan txertatzeko aukerak sortzea. Horrela, aldi berean, enpresen talentu-beharrei eta lurraldeko erronka demografiko eta sozialei erantzun nahi zaie.
Topaketako une nabarmenetako bat proiektuetan parte hartu duten enpresekin egindako elkarrizketa izan zen. Bertan, belaunaldi-erreleboaren kudeaketan izandako esperientziak partekatu zituzten Maiteder Estevezek (Biladu), Begoña Riok (Etorkintza), Itziar Sancho Pascualek (Bilbao Port), Aurora Francok (Grupo Eulen), June Noltek (ASLE), Borja Llonínek (ASOANE) eta Luis Silesek (Cámarabilbao).
Parte-hartzaile guztiek bat egin zuten ideia batean: erreleboak aurrez planifikatzeak inprobisazioa murrizten du, erakundeen funtsezko ezagutza babesten laguntzen du, irteerak zein sarrerak zaintzeko aukera ematen du eta prozesu bakoitza aukera bihurtzen du.
Jardunaldia Generalan eta Relevo Abierto proiektuetan parte hartu duten enpresei egindako aitortzarekin amaitu zen, urte hauetan guztietan erakutsitako inplikazioa eta konpromisoa balioan jarriz.
Topaketa honekin amaitu da enpresen, erakundeen eta instituzioen arteko elkarlanetik sortutako ikaskuntza-etapa bat, baina aldi berean fase berri bati hasiera ematen dio. Etapa berri horretan, belaunaldi-erreleboaren kudeaketa-eredu berritzaileak sustatzen jarraituko da, enpresen lehiakortasuna, enplegu egonkor eta kalitatezkoa eta Bizkaian talentu berria txertatzea bultzatzeko.
Generalan eta Relevo Abierto proiektuak Bizkaiko Foru Aldundiko Enplegua, Gizarte Kohesioa eta Berdintasuna Sustatzeko Sailak %100ean finantzatu ditu, Cámarabilbaok bultzatu ditu eta Aldalanen lankidetzarekin garatu dira.
